អន្តរជាតិ៖ ក្រសួងពាណិជ្ជកម្មចិនបានឱ្យដឹងនៅថ្ងៃទី២៦ ខែកុម្ភៈនេះថា រដ្ឋាភិបាលចិនបានប្រកាសប្រឆាំងយ៉ាងដាច់អហង្ការទៅកាន់សហរដ្ឋអាមេរិក ដែលបានប្រកាសពីការដាក់ទណ្ឌកម្មលើក្រុមហ៊៊ុន និងសហគ្រាសរបស់ខ្លួន ក្រោមហេតុផលនៃការអះអាងថាក្រុមហ៊៊ុន និងសហគ្រាសទាំងនោះមានជាប់ពាក់ព័ន្ធជាមួយរដ្ឋាភិបាលរុស្សី។

នៅលើគេហទំព័ររបស់ខ្លួន ក្រសួងពាណិជ្ជកម្មចិនអះអាងថាប្រទេសចិននឹងចាត់វិធានការចាំបាច់ដើម្បីការពារយ៉ាងម៉ឺងម៉ាត់នូវសិទ្ធិ និងផលប្រយោជន៍ស្របច្បាប់របស់ក្រុមហ៊ុន និងសហគ្រាសចិនទាំងអស់។

គួរបញ្ជាក់ថា រដ្ឋបាលរបស់ប្រធានាធិបតីអាមេរិក ចូ បៃដិន កាលពីថ្ងៃសុក្រកន្លងទៅ បានប្រកាសអំពីការរឹតបន្តឹងលើវិស័យពាណិជ្ជកម្មថ្មីមួយទៅលើអង្គភាព ក្រុមហ៊ុន និងសហគ្រាសសរុបចំនួន៩៣ របស់ប្រទេសរុស្ស៊ី ចិន តួកគី អារ៉ាប់រួម កៀហ្ស៊ីស៊ីស្ថាន ឥណ្ឌា និងកូរ៉េខាងត្បូង ក្រោមហេតុផលថាអង្គភាព ក្រុមហ៊ុន និងសហគ្រាសទាំងនោះបានផ្តល់ការគាំទ្រចំពោះរុស្សីនៅក្នុងបញ្ហាសង្គ្រាមអ៊ុយក្រែន។ 

ការដាក់ចេញនូវទណ្ឌកម្ម និងការរឹតបន្តឹងលើផ្នែកពាណិជ្ជកម្មនេះធ្វើឡើងនៅមួយថ្ងៃប៉ុណ្ណោះ ពោលគឺថ្ងៃទី២៣ ខែកុម្ភៈ មុនការឈានដល់ខួបគម្រប់ ២ឆ្នាំនៃការឈ្លានពានមកលើទឹកដីអ៊ុយក្រែនពីសំណាក់កងកម្លាំងរុស្សីនៅថ្ងៃទី២៤ ខែកុម្ភៈ ឆ្នាំ២០២២ ដោយក្នុងនោះក្រុមហ៊ុន និងសហគ្រាសដែលរងបំរាមថ្មីនេះមានក្រុមហ៊ុនរបស់ចិនចំនួន ៨, របស់រុស្សីចំនួន ៦៣, របស់តួកគីចំនួន ១៦ និង ៤ក្រុមហ៊ុនរបស់អារ៉ាប់រួម៕